علقت الحقوقية ام زياد على قرار رئيس الجمهورية قيس سعيد القاضي بحل المجالس البلدية.
واعتبرت نزيهة رحيبة أن الرئيس “يسير في اتجاه القضاء على كل ما فيه انتخابات… و ديمقراطية ودولة قانون”.
وكتبت في تدوينة على صفحتها الرسمية بموقع التواصل الاجتماعي فيس بوك:
#تنبيه
اذا انت نهضاوي او ائتلافي او لست نهضاويا ولكن أو من جبهة الخلاص … اتعدا طول وما تقراش هاالتدوينة واذا قريتها ما تعلقش (من المستحسن يعني 🙂)
……. اللي يسأل علاش قيس سعيد حل البلديات وهي تنتهي مدتها في ماي… كأنو يطرق في باب محلول على مصراعيه
قيس سعيد يلزم يحل البلديات توا قبل يجي ما الاستحقاق الانتخابي لأن حلها يجي في إطار سياسة التمكين متاعو اللي مش تخليه يحل كل ما هو منتخب وينصب بناؤو القاعدي( كان لزم ينجم يوصل حتى لحل مجالس الأقسام المنتخبة في المدارس والمعاهد والمجالس العلمية والنقابية في الكليات. 😃)..
… قيس سعيد يسير في اتجاه القضاء على كل ما فيه انتخابات… و ديمقراطية ودولة قانون
يقول القائل :كيفاش يتجرأ على حاجة اساسية في اي نظام حكم ديمقراطي عصري وناضلوا وضحاوا من أجلها ناس… ثم كانت ثمرة الثورة!! ؟؟؟؟
… الجواب ساهل :
من جهة عندوا قطعان مناهضين للديمقراطية وكل ما يتعلق بيها و صفحاتهم عندها مدة تطالب بعدم اجراء انتخابات بلدية وبحل البلديات تعويضها بنيابات
ومن جهة ثانية اللي حكموا قبل عيفوا الناس في حاجة اسمها انتخابات للأنهم ما إن يفوزوا ( في لبرلمان والا. للبلديات) حتى يظنوا رواحهم ملكوا كل شي نهائيا و يبداو يسيبوا في الكاكا متاعهم (سامحوني في الكلمة🙏 ما لقيتش غيرها)…… شوفوا الفرحة و الطبال قدام بلدية الكرم… شوفوا التشفي في كرهبة رئيس بلدية صفاقس الخ الخ
…. ما نعممش اما البذرة المنجوسة طغات وجنات على كل شيء باهي وكل مسؤول محترم
…. هذي مناسبة باش الواحد يذكر بجرائم النهضة وجنايتها في حق المسار الديمقراطي اللي. جابوا سعيد و هدمو لكل شي باهي في البلاد……. وكذلك باش الواحد يتساءل … ويتعجب… ويرفض كل تحالف مع ها الملة اليوم وغدوه
#اللي_وحل_البلاد_ما_ينجمش_يخلصها_ولا_يشارك_في_خلاصها
#سعيد_هدام_والنهضة_هدامة ما تنساوش هذا والقاو ثنية للخلاص منهم #الاثنين
ملحق :كي نبدا نحكي في موضوع جدي ومصيري وانت تحطلي ضحكتك الصفراء وتمشى فهذا يعني أنك اما خوانجي بلا عقل والا مزقفن متعصب والا موش متربي… هاذم كلهم ما حجتيش بيهم…. ننزل على الفلسة ونبعثهم في غياهب النسيان
